“Xarici ölkə hərbçilərinin rəqqasələrlə qarşılanması alçaqlıqdır” – AMİP-dən sərt bəyanat

174

“Xarici ölkə hərbçilərinin rəqqasələrlə qarşılanması alçaqlıqdır” 

Ovqat.com xəbər verir ki, bu sərt bəyanatla AMİP çıxış edib.
 
Ötən gün Rusiya Hərbi Dəniz Donanmasının Bakıda rəqqasələrlə qarşılanmasını bu cür qiymətləndirən partiyanın bəyanatında deyilir:

AZƏRBAYCAN MİLLİ İSTİQLAL PARTİYASININ BƏYANATI

 
“Məlum olduğu kimi, dünən Azərbaycanın Xəzər dənizindəki ərazi sularında “Beynəlxalq Ordu Oyunları-2020” yarışları çərçivəsində keçiriləcək “Dəniz Kuboku” müsabiqəsində iştirak etmək üçün Rusiya Hərbi Dəniz Donanmasının (HDD) Xəzər flotiliyasının “Mahaçkala” və “Astraxan” kiçik artilleriya gəmiləri, “SB-738” xilasedici yedək gəmisi Bakıya gəlib.

Qarşılanma törənində xarici ölkə hərbçilərinin rəqqasələrlə qarşılanması hiddət doğurur və bu kimi hadisələrin ölkəmiz adına utancverici hal olduğunu bəyan edirik. Hər hansı ölkəyə məxsus ordunun gəliş məramının nə olmasından asılı olmayaraq bu şəkildə qarşılanması, Azərbaycan qadınının başqa ölkənin hərbi qulluqçuları qarşısında rəqs etməsi alçaqlıqdır. 

Başa düşmək lazımdır ki, gələnlər hər-hansı bir ölkənin mədəniyyət klubunun təmsilçiləri deyil, hərbçilərdir. Ordu oyunlarını rəqs oyunları ilə,  “Dəniz Kuboku” müsabiqəsini rəqs müsabiqəsi ilə səhv salanlar bilməlidirlər ki, Müdafiə Nazirliyinin vəzifəsi rəqs müsabiqələri və ya konsert proqramlarının hazırlanması deyil, ordunun döyüş hazırlığının möhkəmləndirilməsi, ən başlıcası isə düşmənin məhv olunması üçün əməliyyatların hazırlanması və keçirilməsindən ibarətdir.

Azərbaycan Milli İstiqlal Partiyası olaraq bu şəkildə qarşılanma üçün göstəriş verən rəsmi şəxsləri bu biabırşılığa son qoymağa çağırır və onların sərt şəkildə cəzalandırılmasını tələb edirik”.