“Rəsmi Bakı Zoqrab Mnatsakanyanın səfərini diqqətə almalıdı” – POLİTOLOQ

    3

    “Gürcüstan hakimiyyəti Ermənistanla Azərbaycana qarşı əməkdaşlıqda maraqlıdı”

    “Ermənistanın xarici işlər naziri Zoqrab Mnatsakanyanın Gürcüstana səfər etməsi əsasən, Azərbaycanla Gürcüstan arasında baş verən müəyyən problemlərdən istifadayə yönəlib. Həmçinin Azərbaycan əleyhinə rəsmi Tiflislə yeni plan üzrə çalışmaq üçün danışıqlar aparmasını istisna etmirəm”. Hurriyyet.org xəbər verir ki, bu barədə Cənubi Qafqaz Təhlükəsizlik və Sülh İnstitutunun sədri, politoloq Məhəmməd Əsədullazadə deyib.

    “Bidzina İvanişvili Rusiya ilə diplomatik kanalları qoruyub saxlayır”

    M. Əsədullazadə vurğulayıb ki, Gürcüstan hakimiyyəti Ermənistanla əməkdaşlıqda maraqlıdır və bu, Kremlin göstərişi ilə həyata keçirilir: “Gürcüstanda Rusiya əleyhinə etirazlara baxmayaraq, Bidzina İvanişvili Rusiya ilə diplomatik kanalları qoruyub saxlayır və danışıqlar apararaq iqtisadi-siyasi əməkdaşlığı davam etdirməyi planlayır”.

    “Gürcüstan hakimiyyəti Azərbaycandan imtiyazlar almağa çalışır”

    Politoloqun fikrincə, Ermənistan tərəfi çalışacaq ki, rəsmi Tiflislə əməkdaşlığı dərinləşdirsin və bu əməkdaşlıq Azərbaycan əleyhinə yönəlsin: “Rəsmi Bakı Zoqrab Mnatsakanyanın səfərini diqqətə almalı, Azərbaycan əleyhinə hər hansı proses baş verəcəksə, dərhal Tiflislə hesablaşmaq lazımdır. Çünki bugünki Gürcüstan hakimiyyəti Ermənistanla Azərbaycana qarşı əməkdaşlıqda maraqlıdır. Bunun müqabilində Azərbaycandan imtiyazlar almağa çalışır. Bundan əlavə, Moskva-Yerevan oxu Azərbaycan əleyhinə Tiflisidə cəlb etməyi planlayır”.

    Şamo EMİN, Hurriyyet.org