Rasim Musabəyov: “İldə azı 100 min erməni Ermənistanı tərk edəcək” – ŞƏRH

219

Rusiya Prezidentinin son bəyanatı əslində ermənilər üçün o deməkdir ki, oturun yerinizdə. Əlbəttə, Putinin dediyindən belə çıxırdı ki, əslində Nikol Paşinyan satqın deyil, axmaqdır. Ona görə ki, Şuşanı satmamışdı. Sadəcə ona təklif edilmişdi ki, Şuşaya azərbaycanlılar qayıtsın, amma şəhər sizin nəzarətinizdə olsun, rus sülhməramlıları da orada dayansın. Paşinyan bundan imtina etmişdi. Bu əslində axmaqlıq idi.

Hurriyyet.org xəbər verir ki, bu fikirləri teleqraf.com-a politoloq Rasim Musabəyov deyib.

O, əlavə edib ki, Putin ermənilərə razılaşmadan çıxsanız fəlakətə yol açacaqsınız mesajını da verib: “Məncə, bu da ermənilərə xəbərdarlıqdır. Putinə lazımdır ki, Paşinyan öhdəlikləri həyata keçirsin. Sonrasını özünüz bilərsiniz. Sözsüz ki, proseslər bir müddətdən sonra Paşinyanı güdaza verəcəklərini deyir. Hələlik Paşinyan qalacaq”.

Rasim Musabəyovun fikrincə, Putinin Gürcüstan və Ukraynanın adını çəkərək ora NATO-nun gəlişini qeyd edib və bildirib ki, buna yol vermək olmaz: “Amma diqqətlə baxanda bəllidir ki, Türkiyə NATO-nun üzvüdür. Putin deyir ki, Azərbaycan müstəqil dövlətdir, öz müttəfiqlərini seçmək haqqı var, istədiyi dövləti köməyə çağıra bilər və s. Bunlar vacib məqamlardır. Həmçinin təkcə Qarabağın deyil, ətraf rayonların da Azərbaycan ərazisi olduğunu təsdiqləyir. Bu o deməkdir ki, Dağlıq Qarabağda olan erməni əhalisinin Azərbaycandan kənarda hər hansı müzakirənin aparılması mümkün deyil. Bunların hamısı əslində Ermənistana qarşı fikirlərdir”.

Rusiya-Ermənistan münasibətlərinə toxunan Musabəyov hesab edir ki, ermənilərin qaçası yeri yoxdur: “Təbii onlar indi zəncir çeynəyirlər, deyirlər ki, ruslar bizi satdı. Putin də deyir ki, sizi satmamışam, xilas etmişəm. Mən ehtimal etmirəm ki, yaxın illərdə Ermənistanda anti-Rusiya ab-havası güclənsin. Çünki heç kim gəlib Ermənistanı dolandırmaq, təhlükəsizliyini təmin etmək, onların nazı ilə oynamaq istəyində deyil. Belə olan halda Ermənistan dövlət kimi perspektivini itirir. Əlbəttə, Ermənistanda siyasi qüvvələr hakimiyyət uğrunda oyunlarda iştirak edir, müxtəlif fikirlər söyləyirlər. Amma bir azdan sadə erməni biləcək ki, onun dövlətinin perspektivi yoxdur. Əksinə, onlar Azərbaycana, Türkiyəyə deməlidirlər ki, qələt etmişik, bir daha etməyəcəyik. Sizin şərtlərinizi qəbul edib normal münasibətlər qurmaq istəyirik. Bu zaman Ermənistanın öz ərazilərində yaşamaq perspektivləri yarana bilər. Əks təqdirdə revanş haqqında düşünsələr inkişaf perspektivi olmayacaq. Əhali də düşünəcək ki, başımı götürüb hara qaçım. İmkanı olanlar Avropa və Amerikaya, olmayanlar Rusiya, Ukrayna və digər ölkələrə gedəcəklər. Məsələn, əvvəllər Ermənistanı ildə 30 min tərk edirdi, onların 17 mini başqa ölkə vətəndaşlığını alırdı. Karantin qadağaları aradan götürüldüyü halda ildə azı 100 min insan Ermənistanı tərk edəcək”.