“Qarabağ” qarşısına ciddi problemlər fonunda çıxdıq”

57
“Makkabi”nin qələbəsinin memarı əsəbverici ana toxundu

“Yenidən meydana döndüyümüz və qələbə qazandığımız üçün çox xoşbəxtəm. “Qarabağ” önünə ciddi problemlər fonunda çıxdıq”. Bunu Təl-Əviv “Makkabi”sinin hücumçusu Yonatan Kohen Avropa Liqasının I turunda “Qarabağ”la keçirilən oyun barədə danışarkən deyib.

İsrail təmsilçisinin 1:0 hesabı ilə qalib gəldiyi qarşılaşmada yeganə qolun müəllifi olan 24 yaşlı forvard çətinlikləri geridə qoyduqlarını söyləyib: “Koronavirus adi xəstəlik deyil. Evdə bəzi çətin günlər keçirdik, bir ay birlikdə məşq etmədik və yalnız iki gün əvvəl tam heyətlə hazırlığa başladıq. Oyuna hazırlığımız ideal deyildi, amma qələbə qazandığımız üçün şadam. Çünki bu qalibiyyət İsrail futbolu üçün çox önəmlidir. Özümü gümrah hiss edirəm”.

İsrail millisinin üzvü qarşılarında çox çətin iki həftə olduğunu diqqətə çatdırıb: “Hər matça qalib gəlmək üçün çıxırıq. “Zalsburq”la Çempionlar Liqasının pley-off oyunlarını evdən izləmək əsəbverici idi. Ancaq həmin matç geridə qaldı. İndi çempionatın bərpası qərarı, həmçinin Avropa arenasında olmağımız məni çox sevindirir”.

Qeyd edək ki, “Makkabi” II tur çərçivəsində oktyabrın 29-da Türkiyə klubu “Sivasspor”la qarşılaşacaq.