QARABAĞ QAZİSİ: “ELƏ QAZİ VAR 3-4 EVƏ SAHİBDİR, ELƏSİ DƏ VAR DƏRMAN ALMAĞA PUL TAPMIR”

    12

    “Dövlət tərəfindən hazırlanan siyahı üzrə Qarabağ müharibəsi əlilləri, növbəlilik prinsipi gözlənilərək, ev ilə təmin olunur. Bu sistemdə ayrıseçkilik yoxdur”.

    Hurriyyet.org Sherg.az-a istinadən bildirir ki, bunu Vətən Müharibəsi Əlilləri İctimai Birliyinin sədri, Qarabağ qazisi Firudin Məmmədov bildirib.

    O qeyd edib ki, ikinci formada – ictimaiyyətdə tanınan, aktiv və qeyri-aktiv qazilərin xeyriyyəçilər, ölkəmizdə və kənarda yaşayan iş adamları tərəfindən mənzillə təmin olunması zamanı isə ədalət prinsipi gözlənilmir:

    “Bu şəkildə mükafatlandırılan şəxslər arasında elə qazilər var, artıq 3-4 mənzilə sahibdir. Amma dava-dərmanını almağa belə imkanı olmayan Qarabağ əlilləri unudulur.

    Əslində bu məsələdə nə köməklik edəndə, nə də yardımı qəbul edəndə günah var. Çatışmayan cəhət xeyriyyəçilik aksiyalarının ənənə halını almamağıdır. 20-25 ildir, Birinci Qarabağ Müharibəsində əlil olan şəxslər zirzəmilərdə övlad böyüdürlər. Onlara ev verən, kömək edən olmur. Xüsusi diqqət mərkəzində olan qazilər aprel döyüşlərində, yaxın bir neçə ildə cəbhədə əlil olan şəxslərdir. Onların təbliğatı televiziyada, mətbuatda digərlərindən fərqli aparıldığına görə, münasibət də fərqli olub. Bilirəm ki, bu cür fərq qoymaq kampaniyası bəzi qüvvələrin tapşırığı ilə başlanıb. Xeyriyyəçilər də mətbuatda işıqlandırılanları tanıyır, onlara köməklik edir. Sözsüz, müsbət haldır”.

    Xeyriyyəçiliyin genişlənməsinə baxmayaraq, F.Məmmədov hesab edir ki, televiziyaların Birinci Qarabağ Müharibəsi döyüşçüləri ilə son illərdə qazi adını alanlar arasında ayrıseçkilik yaradılması ictimaiyyəti ciddi narahat edir:

    “İllər əvvəl müharibə dönəmində düşmənin texnikasını ələ keçirmək, erməniləri məhv etməklə nəticələnən onlarla əməliyyat aparılıb. Halbuki bu kimi hallar, az yada salınır.

    Azərbaycanda demək olar, hər nəsildə bir qazi yaxud şəhid var. Qoyulan fərqin açıq nümayiş edilməsi insanların narahatlığını artırır. Xeyriyyəçilik ənənəsi başlanırsa, bunu hər kəsə şamil etmək lazımdır. Qarabağ qaziləri təbliğ olunursa, vətənpərvər, özünü vətənə qurban verməyə hazır olanlar önə çəkilirsə, bütün belə şəxslərə aid edilməlidir.

    Xeyriyyəçilər də, çalışmalıdır ki, imkanı olmayan, maddi durumu acınacaqlı qaziləri axtarıb, tapsınlar, yardım etsinlər. Tutaq ki, kimsə kömək etmək istəyir, rahat şəkildə Əmək və Əhalinin Sosial Müdafiəsi Nazirliyinə müraciət edib, növbədəki, ehtiyacı olan qaziyə yardım edə bilər. Belə addım atılsa, mütləq ədalətli olacaq”.