“Koronavirusa yoluxub dünyasını dəyişən səhiyyə işçilərinin adı əbədiləşdirilsin” – QUBAD İBADOĞLU

99

“Karantin mədəniyyətinin formalaşması istiqamətində  maarifləndirmə və təbliğat işləri aparılsın”

 “Azərbaycan koronavirusla müharibənin ən gərgin mərhələsinə qədəm qoyur. Dünən elan olunan ciddi karantin rejimi 21 iyun saat 00:00-dan 5 iyul saat 06:00-dək dövrü əhatə edəcək. Sərt karantin rejimi tətbiq edilən şəhər və rayonlarda heç şübhəsiz ki, yaxın iki həftədə təcili tibbi yardım müəssisələrinə müraciətlər həddindən çox olacaq.”. Hurriyyet.org xəbər verir ki, bunu Azərbaycan Demokratiya və Rifah Hərəkatının sədri, iqtisadçı alim Qubad İbadoğlu deyib.

Q.İbadoğlunun sözlərinə görə, belə olan halda da  əhalinin yaxın zamanlarda artan müraciətlərini idarə etmək heç də asan olmayacaq: “Çox güman ki, bu müraciətlər yalnız virusla bağlı deyil, əhali evdə qalan dövrdə digər səbəblərdən də baş verəcək. Belə ki, kimlərinsə baş və bədən ağrıları yaranacaqsa, hərarəti, təzyiqi, şəkəri artacaqsa, təcili tibbi yardıma müraciət edərək onlardan kömək istəyəcək”.

Q.İbadoğlu sərt karantin rejiminə keçməmişdən əvvəl zəruri saydığı tədbirlər üzrə təkliflərini də təqdim  edib:

“1.Sərt karantin rejiminə keçməzdən  əvvəl əhali arasında  karantin mədəniyyətinin formalaşması istiqamətində  maarifləndirmə və təbliğat işləri aparılsın.

2.TƏBİB sədrinin, səhiyyə nazirinin (əgər varsa) və  sərt karantin rejim tətbiq ediləcək şəhər və rayonların səhiyyə müəssisələrinin rəhbərlərinin  iştirakı ilə geniş videomüşavirə keçirilsin və tibbi  işçiləri yeni mərhələnin qaydaları ilə təlimatlandırılsın (əgər varsa, yoxdursa, təcili hazırlansın).

3.Karantin rejimi sərtləşdirilən şəhər və rayonlara səhiyyə infrastrukturunun və tibbi personalının hazırlığını artırmaq üçün  ora əlavə texniki, insan və maliyyə resursları cəlb edilsin.

4. Səhiyyə sahəsində çalışmış tibb işçilər,  ixtisaslaşmış vətəndaş cəmiyyəti təşkilatlarının nümayəndələri və  könüllülər  səfərbər edilərək, sərt karantin rejimi olan rayonlara ezam edilsin.

5. Səhiyyə işçilərinin əməyinin stimullaşdırılması ilə əlaqədar olaraq yeni dövrün tələblərinə və çağırışlarına uyğun olaraq əlavə tədbirlər həyata keçirilsin. Koronavirusa yoluxub dünyasını dəyişən səhiyyə işçilərinin ailəsinə birdəfəlik 10 min manat yardım edilsin, onların adı əbədiləşdirilsin. Virus daşıyıcısı olan səhiyyə işçilərinin ailəsinin sosial təminatı dövlət hesabına təmimn edilsin, onların ailə üzvlərinin hər birinə müddətli olaraq 250 manat birdəfəlik yardım edilsin. Hazırda ön cəbhədə çalışan səhiyyə işçilərinin əmək haqları müddətli olaraq 10  misli qədər  artırılsın”.

Şamo EMİN, Hurriyyet.org