Fazil Məmmədovun qudası güləş federasiyasına qaytarıldı

    12

    Bu gün Gənclər və İdman Nazirliyində Azərbaycan Güləş Federasiyasının (AGF) seçki konfransı keçirilib.

    Hurriyyet.org xəbər verir ki, tədbiri giriş sözü ilə açan gənclər və idman naziri Azad Rəhimov güləşçilərimizin son illərdə qazandığı qələbələrdən söz açıb.

    O, Avropa çempionatından 18 medal ilə vətənə qayıdan idmançılarımıza təşəkkür edib, onlarla qürur hissi duyduğunu bildirib.

    Rəhimov deyib ki, AGF-də yaşanan problemlərə baxmayaraq, idmançılarımızın uğurlu qələbələri işlərin düzgün şəkildə qurulmasından xəbər verir: “Növbəti sınaq, Argentinada keçiriləcək Yeniyetmələri Yay Olimpiya Oyunları olacaq ki, bu istiqamətdə də uğurlu nəticələrin olacağına ümid edirik”.

    Nazir sonra Namiq Əliyevin yenidən AGF-yə dəvət olunduğunu və I vitse-prezident vəzifəsində çalışacağını diqqətə çatdırıb: “O, güləş aləmində kifayət qədər tanınan və güləşimizin inkişafına öz töhfəsini vermiş insandı. Əliyevin yenidən federasiyaya dönüşü hər kəs tərəfindən çox müsbət qiymətləndirilib. Firdovsi Umudov da komandamızın daim vətənə qələbələrlə qayıtmasında xüsusi zəhməti və xidməti olan insandı. Əminəm ki, federasiyanın vitse-prezidenti və yığmanın baş məşqçisi olaraq bundan sonra da zəhmətini əsirgəməyəcək.”

    Namiq Əliyev, Firdovsi Umudov və digər vitse-prezident Elçin Cəfərov Gənclər və İdman Nazirliyinə daim göstərilən dəstək üçün təşəkkürlərini bildiriblər. Onlar Argentinada keçiriləcək Yeniyetmələrin Yay Olimpiya Oyunları və 2 ildən sonra Tokioda gerçəkləşəcək Olimpiadaya da xüsusi hazırlaşacaqlarına söz veriblər.

    Xatırladaq ki, birinci vitse-prezident təyin edilən şəxs sabiq vergilər naziri Fazil Məmmədovun qudasıdır. Belə ki, Fazil Məmmədovun qızı Namiq Əliyevin gəlinidir. Onlar qohum olana qədər də birlikdə işləyiblər. Namiq Əliyev Məmmədovun müavini vəzifəsini həm Vergilər Nazirliyində, həm də AGF-də tuturdu.

    Onlar quda olduqdan sonra Namiq Əliyev Azərbaycan Güləş Federasiyasından istefa vermişdi. Fazil Məmmədov nazir postundan ayrıldıqdan sonra ƏIiyev də nazirlikdəki vəzifəsini itirdi. Maraqlıdır ki, Namiq Əliyev yenidən Fazil Məmmədovun hələ də prezidenti olduğu AGF-nin birinci vitse-prezidenti vəzifəsinə qaytarılıb./apasport.az/