Ermənilər Fransa kanalının jurnalistini təhdid etdilər

66

Cəbhə xəttindən reportaj hazırlayan TF1 kanalının rəhbər şəxslərindən bəziləri ermənilər tərəfindən başlarının kəsilməsi təhdidi ilə üzləşib

Fransanın TF1 televiziya kanalında cəbhə bölgəsindəki vəziyyət, Azərbaycan Ordusunun şücaəti, Ermənistan silahlı qüvvələrinin mülki insanları və infrastrukturu hədəfə alması, Gəncə şəhərini bombardman etməsi barədə yayımlanan reportajından sonra erməni icması sosial şəbəkələrdə hərəkətə keçib.

“Report” xəbər verir ki, ermənilər reportajın müəllifi, kanalın jurnalisti Liseron Budulu kütləvi şəkildə təhqir etməyə və ona təhdidlər yağdırmağa başlayıblar.

Bununla yanaşı Fransadakı erməni təşkilatları koordinasiya şurasının (CCAF) həmsədri Papazyan Azərbaycanın haqq işi ilə bağlı reportaj təqdim edən televiziyaya qarşı kütləvi etirazlara çağırışlar edib. Hətta kanalın boykot edilməsi barədə təkliflər irəli sürülüb. Ermənilərin kütləvi təhdidindən sonra TF1 reportajın linkini televiziyanın saytından çıxarmağa məcbur olub. Bununla belə kanala qarşı etirazlar hələ də davam edir.

Hətta TF1 kanalının rəhbər şəxslərindən bəzilərinin ermənilər tərəfindən başlarının kəsilməsi təhdidi ilə üzləşdiyi bildirilir.

Qeyd edək ki, bir neçə gün öncə Fransanın TF1 televiziya kanalının jurnalisti Liseron Budul cəbhə bölgəsində olub. O, cəbhə bölgəsindən hazırladığı reportajda Azərbaycanın haqq savaşını nümayiş etdirib.

Jurnalist təqdim etdiyi ekran əsərində Azərbaycanın güclü ordusunun olduğunu vurğulayıb. Reportajda cəbhə xəttinə yaxın yerlərdə insanların gündəlik həyatının çətin olduğu, onların erməni silahlı qüvvələri tərəfindən atəşə tutulduğu göstərilib. Materialda mülki əhalinin evlərinin, mal-qarasının məhv edildiyi göstərilib, ölənlər və yaralananlardan danışılıb.

Jurnalist Ermənistandan birbaşa Gəncənin mərkəzində yaşayış massivinin bir neçə dəfə bombalanmasından danışaraq, dağılmış evləri göstərib.

Həmçinin erməni bombardmanı nəticəsində aralarında uşaq və qadın da olmaqla neçə-neçə günahsız insanın həlak olduğu və yaralandığını diqqətə çatdırıb.

Qeyd edək ki, Azərbaycan Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev özünün tvitter səhifəsində bu haqda yazıb: “Ermənistanın hərbi təcavüzünün qərəzsiz işıqlandırılmasına görə Fransanın TF1 jurnalistlərinin erməni lobbisi tərəfindən təzyqilərə məruz qalmasını və təhdid olunmasını kəskin şəkildə pisləyirik. Bu, peşəkar jurnalistikaya və söz azadlığına qarşı hücumdur”.

KƏNAN