Bakıda şagird özünü məktəbin üçüncü mərtəbəsindən atıb

87

Buna səbəb kimi direktorun onu sinifdən-sinfə keçirməməsi və məktəbdən uzaqlaşdırması göstərilir…

Bakı şəhəri, Binəqədi rayonu Sulutəpə qəsəbəsində yerləşən 313 N-li məktəb şagirdinin intihar etməsi ilə bağlı sosial şəbəkələrdə məlumat yayılıb. Buna səbəb kimi direktorun onu sinifdən-sinfə keçirməməsi və məktəbdən uzaqlaşdırması göstərilib.

Məktəbdən bildirilib ki, təhsil müəssisəsinin 10-cu sinif şagirdi məktəbdə texniki işçi işləyən anasının arxasınca məktəbə gəlib və məktəbdə olan zaman yıxılaraq ayağından xəsarət alıb.

Qeyd olunub ki, təcili tibbi yardım çağırılıb və məktəblinin ayağında sınıq olduğu aşkar edilib: “Həkimlər ona müvafiq tibbi yardım göstərib, zəruri tədbirlər görülüb. Hazırda məktəblinin vəziyyəti qənaətbəxşdir”.

Əlavə edilib ki, məsələ ilə bağlı müvafiq qurumlar tərəfindən araşdırma aparılacaq.

“Bakıda şagird məktəbdə yıxılmayıb, o, özünü məktəbin üçüncü mərtəbəsindən yerə atıb”.

Bu barədə “Report”a hadisənin baş verdiyi 313 saylı məktəbin direktor müavini Nəcəf Bayramov deyib.

O bildirib ki, sosial şəbəkələrdə yazıldığı kimi qız 10-cu sinifdə deyil, hələ yeni tədris ilində 9-cu sinfdə təhsilini davam etdirəcək: “Onun sinifdən-sinfə keçməsi ilə bağlı problemi olmayıb. Anası məktəbimizdə xadimə işləyir və anasının yanına gəlib, naməlum səbəbdən təhsil müəssisəsinin üçüncü mərtəbəsinə qalxıb pəncərəni açaraq özünü atıb”.

TƏBİB-dən açıqlama

Özünü 313 nömrəli məktəbin üçüncü mərtəbəsindən ataraq intihara cəhd edən 9-cu sinif şagirdinin vəziyyəti hazırda ağır-stabil qiymətləndirilir.

Bu barədə TƏBİB-dən bildirilib.

Qeyd olunub ki, məktəbli qapalı kəllə-beyin travması, 12-ci döş fəqərəsinin sınığı və sol baldır sümüyünün açıq sınığı diaqnozu ilə xəstəxanaya çatdırılıb: “Hazırda onun müalicəsi Ak.Mirqasımov adına Respublika Klinik Xəstəxanasının reanimasiya şöbəsində davam etdirilir”.

KƏNAN